چین میں موبائل فون پھٹنے کا واقعہ، بچی معجزانہ طور پر محفوظ
چین میں ایک حیران کن واقعہ پیش آیا جہاں ایک بچی کے چہرے کے قریب موجود موبائل فون اچانک دھماکے سے پھٹ گیا۔ اس واقعے کی ویڈیو سوشل میڈیا پر تیزی سے وائرل ہو رہی ہے اور لوگوں میں تشویش پیدا کر رہی ہے۔
رپورٹس کے مطابق گزشتہ چند برسوں کے دوران دنیا کے مختلف ممالک میں موبائل فون کے اچانک گرم ہونے یا پھٹنے کے واقعات میں اضافہ دیکھا گیا ہے۔ اکثر ایسے حادثات چارجنگ کے دوران یا مسلسل استعمال کے باعث آلات کے زیادہ گرم ہونے کی وجہ سے پیش آتے ہیں اور ان کی ویڈیوز بھی انٹرنیٹ پر سامنے آتی رہتی ہیں۔
ایسا ہی ایک واقعہ حال ہی میں چین میں بھی پیش آیا۔ سوشل میڈیا پر گردش کرنے والی ویڈیو میں دیکھا جا سکتا ہے کہ ایک کم عمر بچی اس وقت بڑے حادثے سے بال بال بچ گئی جب اس کے ہاتھ میں موجود موبائل فون اچانک زور دار دھماکے سے پھٹ گیا۔
🚨A Chinese girl was about to lose her life due to using her phone, as it exploded while charging. pic.twitter.com/7laRN31P9I
— RussiaNews 🇷🇺 (@mog_russEN) March 12, 2026
یہ واقعہ پیر 9 مارچ کو پیش آیا اور گھر میں لگے نگرانی کے کیمرے میں محفوظ ہو گیا۔ ویڈیو میں نظر آتا ہے کہ بچی صوفے پر بیٹھی سکون سے موبائل فون استعمال کر رہی ہوتی ہے اور بظاہر فون چارجر سے بھی منسلک ہوتا ہے۔ چند ہی لمحوں بعد صورتحال اچانک خطرناک رخ اختیار کر لیتی ہے۔
ویڈیو کے مطابق بچی نے فون اپنے چہرے کے بالکل قریب پکڑا ہوا تھا کہ اچانک فون زوردار آواز کے ساتھ پھٹ گیا۔ خوش قسمتی سے بچی کسی بڑے نقصان سے محفوظ رہی، تاہم اس واقعے نے موبائل فون کے محفوظ استعمال کے حوالے سے ایک بار پھر تشویش کو جنم دے دیا ہے۔
اس اچانک دھماکے نے بچی کو شدید خوفزدہ کر دیا، جس کے باعث وہ گھبراہٹ میں اپنا توازن برقرار نہ رکھ سکی اور صوفے سے نیچے گر گئی۔ تاہم خوش قسمتی سے دھماکے کے باوجود بچی کو کوئی واضح یا سنگین چوٹ نہیں آئی۔